भारत सरकारच्या आयुष मंत्रालयाच्या सहकार्याने नागपुरात आयोजन
सरसंघचालक डॉ . मोहनजी भागवत यांच्या हस्ते उद्घाटन
राष्ट्रीय – आंतरराष्ट्रीय स्तरावरील वैद्य देणार मोफत रुग्णसेवा
नागपूर : हजारो वर्षांपासूनच्या शाश्वत , प्रभावी अणि उपयुक्त अश्या आयुर्वेदाचा प्रचार आणि प्रसार करण्यासाठी तसेच , आयुर्वेदाच्या वैज्ञानिक दृष्टीने सेवा , संशोधन व शिक्षण देण्याच्या उद्देशाने स्थापन करण्यात आलेल्या आयुर्वेद व्यासपीठच्या रजत जयंती वर्षानिमित्त 11 ते 13 नोव्हेंबर दरम्यान ‘ आयुर्वेद पर्व ‘ आणि आंतरराष्ट्रीय परिषदेचे आयोजन करण्यात आले आहे .
भारत सरकारच्या आयुष मंत्रालयाच्या सहकार्याने कविवर्य सुरेश भट सभागृह , रेशीमबाग , नागपूर येथे होत असलेल्या या चर्चासत्राचे उद्घाटन शनिवार , 12 रोजी सकाळी 10.30 वाजता राष्ट्रीय स्वयंसेवक संघाचे सरसंघचालक मा . डॉ . मोहनजी भागवत यांच्या हस्ते होणार आहे . या कार्यक्रमाला आयुष मंत्रालयाचे केंद्रीय मंत्री मा.सर्वानंद सोनोवाल , सचिव पद्मश्री वैद्य राजेश कोटेचा , भारतीय चिकित्सा पद्धती राष्ट्रीय आयोगाचे सभापती वैद्य जयंत देवपुजारी व श्री धूतपापेश्वरचे मुख्य कार्यकारी अधिकारी श्री रणजीत पुराणिक यांची उपस्थिती लाभणार आहे .
आदल्या दिवशी शुक्रवार , 11 नोव्हेंबर रोजी सकाळी 9.30 वाजता उपमुख्यमंत्री मा . श्री . देवेंद्र फडणवीस यांच्या हस्ते रुग्ण चिकित्सा शिबिर व आरोग्य प्रदर्शनीचे उद्घाटन होणार आहे . यावेळी आयुष मंत्रालयाचे आयुर्वेद सल्लागार वैद्य मनोज नेसरी , राष्ट्रीय आयुर्वेद विद्यापीठ नवी दिल्लीचे अध्यक्ष पद्मभूषण वैद्य देवेंद्र त्रिगुणा , आयुष महाराष्ट्रचे संचालक वैद्य के राजेश्वर रेड्डी व श्री रणजीत पुराणिक यांची उपस्थिती राहील . शनिवार दि १२ नोव्हेंबर रोजी आयुष मंत्रालयाचे वैद्य श्री कौस्तुभ उपाध्याय यांच्या उपस्थितीत आयुर्वेदीय औषधी निर्मात्यांचे सम्मेलन होणार आहे . रविवार , 13 नोव्हेंबर रोजी सकाळी 11.30 केंद्रीय रस्ते वाहतूक आणि महामार्ग मंत्री नितिन गडकरी यांच्या हस्ते परिषदेचा समारोप होईल .
वैद्य , चिकित्सक , निर्मातेही होणार सहभागी
या परिषदेला देशभरातील सुप्रसिद्ध वैद्य , कुशल चिकित्सक , विद्वान आयुर्वेद शिक्षक आणि विद्यार्थी मोठ्या संख्येने सहभागी होणार आहेत . याशिवाय , भारत सरकारचे धोरणकर्ते , आयुर्वेद औषधी निर्माते , आयुर्वेद पुस्तक प्रकाशक , प्रतिष्ठित आयुर्वेद महाविद्यालयांचाही सहभाग राहणार आहे . या आयुर्वेद पर्वाचा सर्वांनी लाभ घ्यावा , असे आवाहन संस्थापक अध्यक्ष वैद्य विनय बेलणकर , अध्यक्ष वैद्य रजनी गोखले , केंद्रीय , राज्य व नागपूर विभाग कार्यकारिणी सदस्यांनी केले आहे .
निःशुल्क रुग्ण सेवा
या तीन दिवसीय परिषदेत वैशिष्ट्यपूर्ण असा बाह्य रुग्ण विभाग राहणार आहे . यात 11 ते 13 नोव्हेंबर दरम्यान दररोज सकाळी 10 ते 1 व सायंकाळी 4 ते 7 वाजेदरम्यान भारतभरातून आलेले निष्णात आयुर्वेद चिकित्सक निःशुल्क रुग्ण सेवा देणार आहेत . बाह्य रुग्ण विभागाच्या मार्गदर्शक वैद्य मीरा औरंगाबादकर यांच्या मार्गदर्शनात स्त्रीरोग , मधुमेह , संधीविकार , त्वचा विकार , नेत्ररोग , अग्निकर्म व वेदनोपचार , मानसरोग , कर्करोग आदीचे तज्ञ वैद्य रुग्णांना तपासतील व उपचार करतील . रुग्णांसाठी ही सुवर्णसंधी असून याचा मोठ्या संख्येने लाभ घ्यावा , असे आवाहन आयोजकांतर्फे करण्यात आले आहे .
विविध कार्यशाळा , चर्चासत्रांचे आयोजन
तीन दिवसीय या आयोजनात नेत्रचिकित्सा , रक्तमोक्षण , जानुसंधी परीक्षण , अग्निकर्म , मर्म चिकित्सा , आयुर्वेदिय दंतोत्पाटन विषयावर कार्यशाळा होणार असून राष्ट्रीय व आंतरराष्ट्रीय स्तरावरील तज्ञांचे मार्गदर्शन लाभणार आहे . ‘ विदेशात आयुर्वेदाच्या संधी ‘ , ‘ आयुर्वेदातील आपात्कालीन चिकित्सा ‘ , ‘ बीएएमएसनंतर करीअरच्या संधी ‘ , ‘ वन्ध्यत्व ‘ या विषयावर चर्चासत्र होणार आहेत . याशिवाय , संशोधन आदी विषयांवर समांतर सत्रदेखील राहणार आहेत .
पत्रकार परिषदेला आयुर्वेद व्यासपीठचे संस्थापक अध्यक्ष वैद्य विनय वेलणकर , पूर्व अध्यक्ष वैद्य संतोष नेवपूरकर , अध्यक्ष वैद्य रजनी गोखले , कार्यवाह वैद्य विलास जाधव , सहकार्यवाह वैद्य राजेश गुरु , कोषाध्यक्ष वैद्य आनंद टेंभुर्णीकर , वैद्य मृत्युंजय शर्मा , वैद्य मृणाल जामदार , वैद्य श्रीकांत वणीकर , वैद्य प्रसाद देशपांडे , वैद्य हितेंद्र मैंद यांची उपस्थिती होती .
