महावितरणच्या नागपूर प्रादेशिक विभागात सहा महिन्यांत तब्बल 1 हजार 464 वीजचो-या उघडकीस
नागपूर :- वीजचोरी विरोधात सातत्याने कार्यरत असलेल्या महावितरणच्या नागपूर प्रादेशिक विभागांतर्गत असलेल्या सुरक्षा व अंमलबजावणी विभागाने एप्रिल 2023 ते सप्टेंबर 2023 या सहा महिन्यात विदर्भातील अकराही जिल्ह्यात एकूण 5 हजार 339 वीज जोडण्यांची तपासणी करीत तब्बल 10.77 कोटी रुपये मुल्याची 1 हजार 464 ग्राहकांकडे विजचोरी उघडकीस आणली. याशिवाय कलम 126 अन्वये व इतर 1 हजार 293 प्रकरणांमध्ये 25.50 कोटी रुपयांची वीज वापरातील अनियमितता उघडकीस आणली.
या सर्व प्रकरणांत संबंधीत ग्राहकांवर वीजचोरीपोटी निर्धारीत एकूण 36.28 कोटी रुपयांचा शुल्क आणि दंडपैकी 23.52 कोटी रुपयांची रक्कम वसूल करण्यात आली असून विजचोरीची रक्कम न भरलेल्या 155 वीज ग्राहकांविरोधात विविध पोलीस ठाण्यात विजचोरीचे गुन्हे दाखल करण्यात आले आहे.
महावितरण ग्राहकांना अखंडीत विज पुरवठा व इतर सेवा देण्यासाठी प्रयत्नशील आहे. परंतु विज वितरण हानी व विजचोरी यामुळे महावितरणचे मोठ्या प्रमाणात आर्थिक नुकसान होत असते. हे नुकसान टाळण्यासाठी कंपनीमध्ये कार्यकारी संचालक (सुरक्षा व अंमलबजावणी), मुंबई यांच्या अधिपत्यात नागपूर प्रादेशिक विभागाअंतर्गत उपसंचालक (सुरक्षा व अंमलबजावणी) यांच्या देखरेखीत सुरक्षा व अंमलबजावणी विभाग कार्यरत आहे. नागपूर विभागाअंतर्गत संपुर्ण विदर्भात मंडल स्तरावर 12 भरारी पथके व विभागीय स्तरावर 3 भरारी पथके तसेच नागपूर व अकोला येथे सुरक्षा व अंमलबजावणी परिमंडल कार्यालये आहेत.
विजचोरी सामाजिक अपराध असुन त्यामुळे महावितरण व समाजाचे मोठया प्रमाणात आर्थिक नुकसान होत असल्याने आपल्या परिसरात विजचोरी होत असल्यास त्याबाबतची माहिती स्थानिक भरारी पथके, सुरक्षा व अंमलबजावणी कार्यालये किंवा जवळच्या महावितरणच्या कार्यालयास माहिती देण्याचे आवाहन करण्यात आले आहे. विजचोरी प्रकरणाची माहिती देण्या-या व्यक्तीस महावितरणतर्फ़े योग्य ती बक्षिसाची रक्कम देण्यात येत असून माहिती देण्या-यांचे नाव सुध्दा गोपनीय ठेवले जात असल्याची माहिती देखील देण्यात आली आहे.
महावितरणचे अध्यक्ष व व्यवस्थापकीय संचालक लोकेश चंद्रा, कार्यकारी संचालक (सुरक्षा व अंमलबजावणी) स्वाती व्यवहारे आणि प्रादेशिक संचालक (सुरक्षा व अंमलबजावणी) सुनील थापेकर यांच्या मार्गदर्शनात सुरक्षा व अंमलबजावणी विभागातील अभियंते, अधिकारी व कर्मचारी हे विजचोरीमुळे होणारे आर्थिक नुकसान कमी करण्यासाठी सातत्याने प्रयत्नशील आहेत. वीजचोरीविरोधातील सुरक्षा व अंमलबजावणी विभागातर्फ़े राबविण्यात येणारी मोहिम दिवसेंदिवस अधिकाधिक तीव्र करण्यात येणार असल्याने नागरिकांनी अधिकृतपणे वीज पुरवठा घेवून सहकार्य करण्याचे आवाहन देखील महावितरणतर्फ़े करण्यात आले आहे.
